/fdata%2F3994800%2Favatar-blog-1176626823-tmpphphT5Rg0.jpeg){kind=avatar}
“ Ccbaḥa n wuḍan akken llan iḥemmel-itt Muḥ, ama s tebrek d tsusmi d ssfa n yigenni s yitran-is di tefsut d unebdu, ama s rrεud d yigefran di tegrest d taggara n lexrif. Yettxemmim amek aṭas n yimdanen ttaǧǧan ccbaḥa am tagi, gganen ur cliεen ara, ur fursen ula d kra n ddqayeq seg lweqt-agi aberkan yettεeddin yal ass fell-asen, itran-agi i d-yessenṭaqen imedyazen mi ad d-ttmucεalen seg yal tacḍaḍt n yigenni. Amzun ttmeslayen-d i umdan s kra n wayen icebḥen di ddunit, s wayen iwala s wayen ur iwala. Amzun sawalen-as-d ad yafeg ɣur-sen, ad inadi deg yilel-agi aberkan ur nesεi aman, yeččuren s tuffirin. Ah ! lemmer yesεa afriwen ! acu, yesεa allen. Allen ugarent afriwen imi ttawḍent uqbel afriwen gar yigenni d tmurt, ttawḍent ula ɣer yigenni anda ur ssawaḍen ara wafriwen. Am win ad t-id-yewwten s waman di tguni-s ! yemmekti-d Lila. Amek, allen-is ihi zemrent ad t-ssiwḍent ɣer tin iḥemmel ? …”