Leḥraca d teγyulit

Ur cfiγ ara i wass-n ideg iyi-t-semman, acu kan akka i d-ufiγ seg wasmi i d-faqeγ qqaren-iyi "uḥric" !! Anwa iyi-isemman akka ? Ur ẓriγ ur εlimeγ ! Ayen ẓeriγ nekk d uḥric. D tidet ḥerceγ, akka iyi-d-qqaren medden, leḥbab, imdukal, imawlan-iw, abeεda yemma tezga teqqar-iyi-t-id am wazul deg yimi-s seg wasmi lliγ d amecṭuḥ. Tura imi akka imγureγ-d ciṭṭuḥ, wwiγ-d iman-iw s lqedd d tmusni, bdiγ seqsayeγ iman-iw: Amek tga tiḥerci agi iyi-semman ? Almi iyi-semman uḥric akken ḥerceγ neγ almi ḥerceγ akken iyi-semman uḥric ? Dγa mi qimeγ akka cwiṭ d yiman-iw ad d-yuγal useqsi-a d wayen akk icudden γur-s. Ar ass-a mazal ur tt-friγ  ara d yiman-iw amek akka. Win i wumi nniγ anwa iyi-isemman akka ad yini ur ẓriγ ara, ufiγ-d ssawalen-ak akka ssawaleγ-ak-d ula d nekk ! Fru-tt tura keçç a yamdan !

Yiwwas tedduγ-d deg ufurgu s axxam, abrid abrid ttwaliγ si ṭṭaq ayen iγef nettεddi , ama d abrid ama d isekla deg ugama yettazzalen ar deffir di tmuγli-w. tikkelt-nni remqeγ akka nebεid deg yiwen n useḥraraf akken qqnen aγyul. Din yeḥbes ttexmam-iw γur-s , tedda-d tugna-s deg wallaγ-iw akenn afurgu iteddu. Yiwen n useqsi yezzi-d amzun si zik i yella, yeqqar: Amek , semman-as aγyul dγa yuγal d aγyul neγ almi yella d aγyul akken i as-semman aγyul ? Xemmeγ xemmeγ anda ad d-afeγ tiririt ulac. Ansi bdiγ ad d-fγeγ γyur-s akken yebγu meyzeγ ! Ayen kan i d-ikecmen allaγ-iw d asaγ gar temsalt-iw akked temsalt n uγyul, imi yezmer ahat uγyul ad yili d uḥric , uḥric ad yili d aγyul, acku akken yezmer ad yili d awal i d-yezwaren lmeεna i tezmer ad tili lmeεna tezwar awal. Da iyi-yekcem ccek imi yezmer lḥal nekk d aγyul semman-iyi uḥric , aγyul d uḥric semman-as aγyul ...Nekk ẓriγ llan yiγyal uḥricen rnu nezmer ad as-nsemmi i uγyul uḥric imi d tidet yeḥrec, ma d uḥric , bγiγ ad d-niγ , neγ ur d-qqareγ ara, axir ad as-anfeγ.

                                            Hocine Louni