Yiwen n yiḍ (Une nuit d'un SDF)

Ulac awal,

Ulac tasusmi.

Yeggugem yimi

Yettmeslay.

Σlay am netta am nekk,

Maεna akken yexdem yexdem :

Tizegzewt sdat wallen,

Tebrek d kra n yiniten…

Ah ya tafat !

Awi am-yeḥkan

Deg yiḍ n ṭṭlam !

Ah lemmer tfehhmeḍ awal,

Nekk yid-s mi d-nemqabal,

Kemm di tlemmast am ugugam,

Initen cerken yid-neɣ amkan,

Iselsa d kra yellan…

Igenni yecbeḥ mellul,

Ttwaliɣ kan deg-s tikwal.

Ma d asiwel, ulac !

Nniɣ ahat ṭṭsen !

Yal yiwen amek.

Win iyi-yecban, wissen

Ma yezger ilel di ṭṭlam,

Neɣ yeεfes yentel,

Ul yessaram,

Yebɣa ad ibeddel ?!

Ahat !

Awwah, d nadam kan i yennudem.

Ayen akk i as-yezzin yeṭṭes.

Netta d nnamus kan.

Yalci d agugam,

Aẓenẓen, tuzya fell-as.

Yekkat s ufus,

Yebɣa ad yekmez,

Meεna yettaru !

Ulamek !

Yetti tiferkit, teččur.

Yura "ulamek".

Aḍar iḥerrek,

Гef gma-s yuli.

Tiṭ tettwali.

Yesnuffus,

Yesmeḥsis,

Yettaru,

Ur yettxemmim.

I wacu ?

Akersi d ilem.

Wissen bab-is !

Ahat yeṭṭes,

Neɣ yettaru,

Yeǧǧa-t yiḍes ?!

Wer ccek yedla yeṭṭes.

Yetti yekmez,

Yetti s ufus,

Yeṭṭef s wayeḍ.

Yesla i tsusmi,

Akken kan tessusem,

Tuɣal tendeh.

Awwah !

Ur tettsusum.

Гas ma tendeh,

Yedda d waḍu.

Ma d aḍu

Yeggugem.

Wissen asemmiḍ

Mi d-yeɣli yiḍ

S anda yerra ?!

Yettergigi,

Zelmeḍ yeffus.

Yečča-t wul-is,

Yettergigi.

Yedla ifadden,

Yekref afud.

Yesla i yiḍarren,

Di berra,

Σeddan ruḥen.

Wissen d acu-t ?!

Ahat d amdan,

Neɣ d cciṭan,

Aεessas n yiḍ,

Medden akk ṭṭsen.

Wissen !

Iḍarren,

Zzin ansi i d-kkan,

Neɣ tezzin kan.

Yesla i lheffa,

Yerra nnehta,

Yeḥbes yerra,

Yeḥbes

Tekfa

Teččur.

Zzi tettiḍ,

Kmez tinzar,

Snuffes…

Ḥbes !

Rnu kmez.

Ssiɣzef ternuḍ,

Aru kan kra,

A bu-yimru,

Mebla aqerru.

Di ṭṭlam,

Yeǧǧa-t nadam.

Yeẓẓel,

Yettwali ayen i as-yezzin :

Yecbeḥ yecmet !

Yettergigi.

Imi teččur.

Ad yezzi ?

Tetti,

Mazal tiyeḍ,

Am tid yekfan.

Гas ttu,

Sraḥ kan tedduḍ yid-s.

Ẓẓidet,

Tesmektay-d s ziiiik,

Asmi yella…

Ih yella,

Ssssss.

Ur steεfay ara.

Rnu kan ɣer sdat.

Ayen teddiḍ drus.

Abrid ɣezzif.

Wissen ar melmi ?!

Ddu kan, ddu kan

Ur sḥissif,

Ur ttxemmim.

Kullci ad ifak,

Am wass-a,

Am yiḍ-a,

Am kra yekfan.

Ur reffu ara.

Zreb kan tikli.

Iḍ ur d-iɣelli.

Deg-s i telliḍ,

Deg-s i telsiḍ.

Ur ttmurrud ;

Ayen akk iteddun,

Wa yettṣeffir

Wa yessusem am tsusmi,

I war dqal.

Wissen azekka,

Гas da yella,

S anda ad yaweḍ !

Ayen iεeddan,

Ayen i d-iteddun,

Kullci iεedda.

Am lheffa :

Aḍar yedda,

Din da, din da,

Daddac daddac,

Yiwet snat, yiwet snat,

Din din iruḥ.

Anda-k a rruḥ !!

Yeffud yimi,

Yeffud aman,

Deg-sen yettwali,

Σemren allen-is :

Aman, aman…

I win yeswan,

D acu i d-yerna ?

Am win yenɣan,

Netta ihenna.

Win yemmuten,

D netta kan,

Fiḥel aman.

Imi tettuḍ,

Aha kan.

Yemmekti-d ass-is

Azal-is…

A tin yexdem !!

Iger afus-is,

Yeddem-d ayen ur nettwaddam.

I wumi nadam ?

I wacu asḥissef di ṭṭlam ?

I wacu ayen iεeddan

Mazal ẓẓay ?

Yemmal lmizan,

Tugniwin ttεeddint,

Zerrint

Gar wallen mi medlent.

Ula ma ldint,

D ismektiyen

Yeččur wallaɣ :

Ass ur yecbi gma-s,

Aqraḥ ur yettwakmaz,

Ṣber neɣ qqim.

Ur ttarra iman deg umkan.

Netta igen,

Kečč ur neggan.

Ayen akk yexdem,

Kečč telliḍ,

Netta yid-k.

Netta yeggan,

Kečč ulamek.

Terwiḍ εawaz,

Teṛwiḍ ussan.

Ma d iḍ inek,

Am kečč netta,

Ur yeggan, ur yettnadam.

Di sin tellam,

Temcubam.

Netta ɣezzif,

Wezzil lawan.

Igen εeryan

Akken yuki.

Weḥd-s weḥd-s,

Acḥal yettu !

Acḥal yezzi !

Ixemmem, yemmekti-d,

Yettu, yessusem, yesmeḥsis,

Yekmez, yeḥbes tikli

Deg umkan-is.

Yečča-t wul-is,

Ur yettwakmaz.

I ffad d llaẓ

Yettergigi.

                                      Ḥusin Luni